Ervin Skela ka nënshkruar një kontratë të re me Eintracht Frankfurt, deri më 30 qershor 2025. Vlonjati sezonin e fundit ka qenë trajner i Eintracht Frankfurt U17 dhe tani kalon te 19-vjeçarët.
Skela do të jetë ndihmëstrajner, krah Damir Agovic, në ekipin që do të luajë UEFA Youth League, ekuivalenti i Champions League për të rinj.
Ish-fantazisti i kombëtares është pjesë e klubit gjerman prej dy vitesh, ku e nisi si zëvendëstrajner te 17-vjeçarët.
Skela po i ngjit shkallët një e nga një dhe vlerësimi është maksimal për të, pasi edhe ka luajtur me Eintracht Frankfurt në periudhën 2001-2004.
Shefi i akademisë, Alexander Richter, ka deklaruar: “Ervin Skela është një shtyllë e rëndësishme në zhvillimin e lojtarëve tanë, si në aspektin e futbollit, por edhe për t’u treguar lojtarëve të rinj se çfarë do të thotë të luash për Eintracht Frankfurt”. / oversport.tv
Foto: Eintracht Frankfurt, Twitter
