PRAGË, 22 qershor /ATSH-DPA/- Republika Çeke deri më tani ka shpenzuar mbi 291 milionë euro për të përballuar fluksin e refugjatëve ukrainas, sipas shifrave zyrtare.
“Më shumë se gjysma e kësaj shume, rreth 162 milionë euro janë shpenzuar për kryerjen e pagesave të mirëqenies sociale”, njoftoi sot Ministria e Financave, sipas agjencisë CTK.
Të dhënat aktuale nga Ministria e Brendshme tregojnë se mbi 380,000 ukrainas kanë marrë leje qëndrimi në Republikën Çeke që nga fillimi i pushtimit rus, pothuajse katër muaj më parë.
Refugjatët ukrainas kanë përfituar një ndihmë mujore ekonomike deri në 5,000 koruna (202 €).
“Mbi 70,000 ukrainas kanë gjetur punë në Republikën Çeke”, tha qeveria.
Sipas agjencisë së statistikave të BE-së “Eurostat”, në Republiken Çeke norma e papunësisë arriti në 2.4%.në prill, duke shënuar nivelin më të ulët në të gjithë BE-në. //a.i/