Edy Reja, pas barazimit të Shqipërisë në miqësoren kundër Gjeorgjisë, ka analizuar atë që ndodhi në fushë në RTSH, ndërkohë që foli edhe për emra të veçantë si Broja e Asllani. “Pas ndeshjes me Spanjën motivimi ishte krejt ndryshe. Sigurisht kur ke ndeshje të tilla kaq afër, duhet të bësh rotacion.
Jam i kënaqur me Asllanin, ka treguar personalitet, nuk ka frikë në fushë. Po përpiqem të gjej lojtarë të rinj, t’i afroj dhe ta bëj skuadrën më kompetitive. Në miqësore është e rëndësishme të fitosh lojtarë të rinj. Duhet pak kohë për t’u integruar. Edhe Vrioni bëri mirë, por i duhet kohë. Me kalimin e kohës, do të përpiqemi të afrojmë edhe ndonjë lojtar tjetër, për ta bërë më kompetitive skuadrën”.
Më tej italiani shtoi: “Gjeorgjia është një skuadër që ka mundur Bosnjë, një skuadër shumë e vështirë për t’u përballur. E dinim që ishte skuadër e fortë. Motivimi dhe karikimi i skuadrës pas ndeshjes me Spanjën ishte disi i vështirë. Djemtë vrapuan shumë dhe dhanë maksimumin. Në 20 minutat e fundit u përpoqëm të gjenim golin, por nuk ia dolëm. Këto skuadra lenë shumë pak hapësira dhe ne i vuajtëm mungesën e hapësirave dhe ngjeshjen mbrapa”.
“Asllani? Edhe Asllani edhe Gjasula luajnë në të njëjtin pozicion, përpara mbrojtjes. Ka pasime shumë të mira. Ndonjëherë është shumë i shpejtë dhe lojtar i rëndësishëm. Do të ketë një karrierë të madhe sipas meje”.
“Moduli? Mund edhe të provoja diçka ndryshe, por nuk kisha karakteristikat e duhura për të bërë ndryshimet e duhura. Duhet të kesh 2 skuadra të përshtatshme për të bërë prova. Ndoshta në një ndeshje tjetër, me siguri do të bëj diçka ndryshe. Gjimshiti ka qejf të luajë me 3 në mbrojtje”.
“Broja? Nuk ishte në ditën e tij më të mirë, kishte probleme në kavilje. Kur ndez dritat është i papërmbajtshëm, por nuk është lojtar për miqësore. Ka nevojë për stimuj më të mëdhenj, për skuadra më cilësore”, përfundoi Reja. / oversport.tv
