Drejtoria e Mirëqenies Sociale e Komunës së Prishtinës, në kuadër të fushatës vetëdijesuese për trajtimin e fëmijëve në situatë rruge, këtë të mërkurë, organizoi një aktivitet me moton “Unë s’jap lëmoshë, AS TI & Bashkë t’i mbrojmë fëmijët në situatë rruge”.
Kjo pasi dhënia e lëmoshës për këtë kategori po del të jetë goxha e rrezikshme dhe në të njëjtën kohë edhe stimuluese.
Andaj për këtë po kërkohet diçka konkrete nga Drejtoria e Mirëqenies Sociale në kryeqytet.
“Kërkojmë vetëdijesimin dhe ndërgjegjësimin e qytetarëve tanë për mosdhënie të lëmoshës, pasi ndikon negativisht në këtë dukuri”, ka thënë drejtoresha për Punë Sociale, Adelinë Sahiti.
Përveç se nuk jep vetë asnjëherë, ndalimin e dhënies së lëmoshës për fëmijë po e kërkon edhe kryetari Përparim Rama.
“Është një dukuri që ne duke u mundu me ba mirë, e dëmtojmë lëmoshëkërkuesin”, tha ai.
Për t’i vetëdijesuar më shumë qytetarët që asnjëherë të mos japin lëmoshë për fëmijët në sheshin e kryeqytetit u shpërndanë edhe fletushka.
