“Policët me kamera në uniformë”, SHBA me donacion në vlerë të mbi një milionë dollarëve për RMV-në

by admin
Spread the love

Në ambientet e Njësisë Mobile për Siguri të Komunikacionit Rrugor në Petrovec sot u shënua përmbyllja e projektit “Sistem mobil për regjistrim me kamera” për nëpunësit e policisë që kryejnë kontroll dhe rregullim të komunikacionit.

Projekti paraqet donacion me një vlerë prej 1.061.000 dollarë amerikanë, projekt i programit ICITAP të Departamentit të Drejtësisë së Qeverisë së Shteteve të Bashkuara të Amerikës dedikuar për Njësitë për Komunikacion dhe Njësitit për Çështje Kufitare. Programi mbështet një pilot projekt për kamera mobilë të Njësitit Mobil për Siguri të Komunikacionit Rrugor që nga viti 2016, që ishte hera e parë që nëpunësit e policisë së shtetit të pajisen me kamera mobilë në vendin e punës.

“Vënia në përdorim të kamerave mobilë pati efekt pozitiv në marrëdhëniet mes policisë së komunikacionit dhe qytetarëve të ndaluar për kundërvajtje rrugore. Numri i ankesave të parashtruara kundër nëpunësve të policisë ishte ulur dukshëm dhe anketa elektronike e zbatuar në vitin 2021 tregoi një nivel më të lartë të satisfaksionit edhe te të dyja palët – nëpunësve të policisë dhe qytetarëve”, tha ushtruesi i detyrës në Ambasadën e SHBA-së në shtet Erik Majer.

Ai tha se këtë vit, përmes ICITAP, mbështetja u zgjerua për sektorët për punë të brendshme në Tetovë, Ohër, Kumanovë, Shkup, Veles, Manastir, Shtip dhe Strumicë, si dhe për Departamentin për Çështje Kufitare dhe Migrim me donacionin e 593 kamerave. Kamerat mobile, siç tha, tashmë janë vendosur në funksion në Shkup, Tetovë, Kumanovë, Ohër, në pesë pika kufitare si dhe në Njësitin Mobil për Masa Kompenzuese, ndërsa deri në fund të këtij muaji do të fillojë përdorimi edhe në qytetet e tjera.

Ministri i Punëve të Brendshme, Oliver Spasovski deklaroi se është krenar që relativisht në një interval të shkurtër kohor kanë arritur në Ministrinë e Punëve të Brendshme të realizojnë shumë projekte dhe detyra reformuese.

“Bëhet fjalë për një projekt që ka vend thelbësor në planin strategjik të Byrosë për Siguri Publike pranë MPB-së në pjesën e komunikacionit, gjegjësisht çështjeve rrugore implementimi i të cilit mbështetet dhe në mënyrë normative përmes Ligjit për polici dhe në mënyrë operative përmes procedurave standarde operative ekzistuese për punë që sjell përfitim që shumë ka rëndësi edhe për ne si polici edhe për qytetarët si pjesëmarrës në komunikacion. Në fakt, me sistemin mobil për regjistrim jo vetëm që do të fitohet në cilësi dhe dokumentim të kundërvajtjeve, por njëkohësisht përmirësohet cilësia e veprimit të policisë, profesionalizimit dhe transparencës”, tha Spasovski.

You may also like