MOSKE, 28 shkurt /ATSH-DPA/ – Kremlini thotë se arritja e qëllimeve të luftës së Rusisë në Ukrainë ka përparësi ndaj çdo negociate të mundshme të paqes.
Zëdhënësi i Kremlinit Dmitry Peskov deklaroi se nuk kishte asnjë shenjë deri tani nga Kievi se ukrainasit ishin të gatshëm të bisedonin.
“Në këtë rast, arritja e qëllimeve tona është gjëja më e rëndësishme, ky është prioriteti ynë kryesor”, theksoi Peskov.
Presidenti ukrainas Volodymyr Zelensky ka refuzuar negociatat me presidentin rus Vladimir Putin me dekret dhe e ka përsëritur këtë disa herë.
Ai prezantoi planin e tij, i cili thotë se Rusia duhet të tërheqë plotësisht trupat e saj nga Ukraina, si një parakusht kryesor për fillimin e bisedimeve të paqes.
Rusia, e cila nisi një pushtim në shkallë të plotë të Ukrainës rreth një vit më parë, e ka hedhur poshtë atë si marrëzi. /os/