Deputeti i PD, Agron Gjekmarkaj, ka reaguar lidhur me grupimet e krijuara në PD dhe klasifikimin e emrit të tij në ndarje të ndryshme.
Gjekmarkaj ka sqaruar se nuk bën pjesë në asnjërin prej grupeve të krijuara dhe se madje as në atë të deputetëve që nuk shkonin në asnjërën prej mbledhjeve për të mos krijuar përçarje të mëtejshme.
Postimi i plotë:
“Një sqarim për grupet në PD dhe marrëdhënien time me to !
Herë pas here e gjej veten në lajme, komente, analiza e muhabete pjestar i një prej tre grupeve në PD. Unë jam vetem në PD. Paradoksi është se dy grupet e tjera i kuptoj por këtë “grupin” tim as e kam parë ndonjëherë e as takuar!
Grupi i parë është ai i “revolucionit që marshon” trokun zhurmëmadh të të cilit drejt pushtetit e ndien çdo shqiptar, madje po ju fut dridhmen edhe një palo superfuqie matanë atlantikut! Grupi i dytë është ai “zot bëje mirë” ninullat e të cilit i ndien çdo vater po kaq. Ndërsa tek grupi i tretë fusin tepricat e atyre që nuk shkojnë as tek mbledhjet e njërit as tek mbledhjet e tjetrit. Përfitojnë nga ky fllad pranveror, nga cicërimat e zogjve dhe mendojnë ndër hije si e mori dreqi këtë punë?! Jangellesh, jangellesh.
Unë dua të sqaroj me përunjësi që nuk bëj tash për tash pjesë as në grupin e tretë i cili si ideologji përbashkuese ka mos marrjen pjesë në mbledhjet e dy të parëve! Më ndihmoni të kuptoj si mund të quhet grup një masë njerëzish në punë të vet që s’kanë bërë kurrë një punë të përbashkët, madje asnjë mbledhje “grupi” që në vetvete do ishte vetë puna?!!”-shprehet ai.
