Lladrovci i përgjigjet Ajazajt pasi tha se mund të jetë njëri nga dëshmitarët kundër ish-krerëve të UÇK-së në Hagë

by admin
Spread the love

Kryetari i komunës së Drenasit, Ramiz Lladrovci i është përgjigjur kundërkandidatit të tij Driton Ajazajt pas një deklarate të tij ku mes tjerash tha se Lladrovci përfolet se mund të jetë dëshmitar kundër ish-krerëve të UÇK-së në Hagë.

Lladrovi tha se ky është një dyshim i ulët dhe shtoi se për këtë shpifje, dikush po përgjigjet para organeve të drejtësisë.

Tutje ai tha se këto lloj shpifjesh ndaj tij dhe shokëve të tij I prodhojnë “ hutat me traditë të ish-regjimit”.

“Përveç se është dyshim i ulët, është edhe i neveritshëm. Për këtë shpifje, dikush tashmë po përgjigjet para organeve përgjegjëse. Këto lloj shpifjesh, kundër meje dhe shokëve të mi, mund të prodhojnë vetëm hutat me traditë të ish regjimit. Jam krenar me të kaluarën, të tashmen dhe të ardhmen në Republikën e Kosovës dhe qenies së kombit tim. Qentë lehin e fitoren tonë s’mund e pengon askush”, ka thënë Lladrovci për Express.

Ndryshe, kandidati për kryetar të Drenasit nga Demokratët për Drenasin, Driton Ajazaj, vlerësoi se kundërkandidati i tij, Ramiz Lladrovci, ka humbur besimin e qytetarëve në balotazh.

Ajazaj deklaroi se Lladrovci po gënjen se e ka marrë mbështetjen e ish-presidentit të vendit, Hashim Thaçi, nëpërmjet një bisede telefonike nga Haga.

Ajazaj mes tjerash vlerëson se Lladrovci dyshohet të jetë dëshmitar kundër tyre në Hagë.

“Nuk i di raportet e tyre personale por përfolet se ky mund të jetë njëri nga dëshmitarët e tyre dhe për mua është e pakuptimtë që të thirret në biseda telefonike kur i dalin dhjetëra incizime ku ky mund të jetë dëshmitar potencial kundër tyre. Kam dëgjuar se më 19 nëntor 2019 ka qenë në Hagë në cilësinë e dëshmitarit por se çfarë dëshmitari duhet ta tregoj ai vetë. Nuk ka mundësi që të ketë kontakte – është mashtrim publik që po tenton ta bëjë por do të humbet”, deklaroi Ajazaj në Klan Kosova.

Ramiz Lladrovci dje në një intervistë për Gazetën Online “Reporteri.net”, ka dhënë detaje për bisedën telefonike që zhvilloi ditë më parë me Hashim Thaçin nga Haga.

“Biseda ishte e rastit, ishte thirrje nga z. Thaçi. Ishte e papritur, prandaj e kam quajtur edhe ndër bisedat më emocionale në jetë. Ishte hera e parë që kam biseduar me të prej se ndodhet në Hagë, ndërsa pas përshëndetjeve, pyetjeve për shëndetin e të gjithëve atje, vazhdova si bisedë që bëhet me shokun, ndërsa ai më pyeti rreth situatës këtu, të cilën e përcolli me mesazhin, “je i pathyeshëm, veç vazhdo”, shpreha falënderim me dëshirat për ta pritur sa më parë në Kosovë”, ka thënë Lladrovci për Reporteri.net.

Lajme interesante

You may also like