Ministri i Jashtëm rus Sergei Lavrov u detyrua të anulojë udhëtimin e tij në Serbi sot pasi një sërë vendesh përreth e ndaluan avionin e tij të hynte në hapësirën e tyre ajrore.
Pas kësaj situate, Kremlini e ka përshkruar veprimin nga Maqedonia e Veriut, Bullgaria dhe Mali i Zi si “veprim armiqësor”. Lavrov ka folur mbi këtë situatë të cilën e ka quajtur të paprecedente.
“Ne ende nuk kemi marrë një shpjegim për vendimin”, tha ai. Lavrov shtoi se homologu i tij serb është ftuar në Moskë dhe ai “shpreson se udhëtimi i tij nuk do të pengohet”.
Ndërkohë, zëdhënësi i Kremlinit Dmitry Peskov u tha gazetarëve se veprime të tilla mund të shkaktojnë probleme me orarin e takimeve diplomatike të nivelit të lartë.
Megjithatë, ata nuk do ta pengojnë Moskën të mbajë kontakte me vendet mike, tha ai.
Ndërkaq, Presidenti i Serbisë, Aleksandar Vuçiq, ka thënë se sonte në ditarin në RTS1 do të flasë më gjerë për këtë çështje.
Të dielën, katër vende: Rumania, Bullgaria, Maqedonia e Veriut dhe Mali i Zi njoftuan se nuk do të lejojnë avionit me Lavrovin në bord të fluturojë mbi hapësirat e tyre ajrore.
Lavrov ishte paraparë të vizitonte Beogradin më 7 qershor.
Për shkak të kësaj vizite, Gjermania kishte vënë në pikëpyetje vizitën e kancelarit Olaf Szholz më 10 qershor në Beograd. Mbi Serbinbë është rritur presioni të përcaktohet nëse cilin kah dëshiron të rrugëtojë – në Lindje me Rusinë apo me Perëndimin. Serbia është ndër vendet e vetme në rajon që ka refuzuar deri më tash t’i vë sanksione Rusisë për shkak të agresionit në Ukrainë. /SHENJA/