Ministria e Infrastrukturës dhe Energjitikës, ka reaguar pas një lajmi që është publikuar në mediat vendase, se jahti luksoz i manjatit rus, Roman Abramovich, ka hyrë në ujërat territorialë shqiptarë.
Me anë të një njoftimi për mediat, ministria e mohon këtë informacion duke shtuar se mjeti lundrues “Solaris”, është duke lëvizur në ujërat ndërkombëtare midis Italisë dhe Shqipërisë.
Sipas ministrisë, jahti i Abramovich, ka lënë portin Marina Montenegro të Malit të Zi, dhe po lëndron drejt Detit Mesdhe.
Njoftimi i Ministrisë së Infrastrukturës dhe Energjitikës:
“Lidhur me lajmin e publikuar sot në media, për hyrjen në ujërat territorialë të Republikës së Shqipërisë, të një mjeti lundrues në pronësi të shtetasit rus, Roman Abramovich, Ministria e Infrastrukturës dhe Energjisë sqaron se:
Nga verifikimet e kryera në sistemet e monitorimit të trafikut detar “Marine Traffic”, rezulton se mjeti lundrues “Solaris” është nisur nga Porti turistik Marina Montenegro në Tivat, Mali i Zi dhe po lëviz për në jug drejt Detit Mesdhe.
Mjeti lundrues i mësipërm, aktualisht është duke lundruar në ujërat ndërkombëtare, midis Italisë dhe Shqipërisë, në drejtim të Jugut dhe nuk ka ndaluar apo hyrë në ujërat territoriale të Republikës së Shqipërisë.”, shkruhet ne njoftim.
