Sipas një hulumtimi të Universitetit Yale, ekonomia e Rusisë është “sakatosur në mënyrë katastrofike” nga sanksionet perëndimore dhe eksodi masiv i kompanive ndërkombëtare.
Hulumtimi, për të cilin autorët thonë se është analiza “e parë gjithëpërfshirëse” e ekonomisë ruse, zbuloi se që nga fillimi i luftës në Ukrainë, Rusia ka marrë një goditje shkatërruese, përcjell Telegrafi.
“Rusia ka humbur kompani që përfaqësojnë ~ 40% të BPV-së së saj, duke përmbysur pothuajse të gjitha tre dekadat e investimeve të huaja”, shkruajnë studiuesit në Shkollën e Menaxhimit të Yale, duke shtuar se kjo situatë është përkeqësuar nga një largim “i paprecedentë” i kapitalit dhe popullsisë.
Më shumë se 1000 kompani kanë kufizuar operacionet e tyre në Rusi ose janë larguar tërësisht nga vendi që nga fillimi i luftës në Ukrainë, pothuajse në çdo industri, nga moda tek financat.
Hulumtimi i Yale, i cili u botua më 20 korrik, thotë se sanksionet ndërkombëtare kanë “përkeqësuar në mënyrë të pakthyeshme” eksportet e Rusisë dhe se importet në vend “kanë rënë në masë të madhe”.
Kjo ka çuar në “mungesa të gjera të furnizimit” brenda Rusisë dhe ka bërë që prodhimi vendas, i cili mbështetet në importet në të gjitha industritë, të ndalet.
“Pavarësisht iluzioneve të Putinit për vetë-mjaftueshmërinë dhe zëvendësimin e importit, prodhimi vendas rus ka ngecur plotësisht pa kapacitet për të zëvendësuar bizneset, produktet dhe talentin e humbur; zbrazja e bazës së inovacionit dhe prodhimit të brendshëm të Rusisë ka çuar në rritjen e çmimeve dhe ankthin e konsumatorëve”, ka shkruar ekipi i Yale.
Statusi i Rusisë si një eksportues kryesor i mallrave ka marrë gjithashtu një goditje, sipas studiuesve.
“Pozicioni strategjik i Rusisë si eksportues i mallrave është përkeqësuar në mënyrë të pakthyeshme, pasi ajo tani përballet nga një pozicion dobësie me humbjen e tregjeve të dikurshme kryesore”.
Rruga Press
