BERLIN, 29 tetor /ATSH-DPA/-Presidenti i Shoqatës Gjermane të Industrisë Kimike (VCI), Markus Steilemann, i ka kërkuar qeverisë të veprojë më shpejt, lidhur me kufirin e planifikuar për çmimet e gazit dhe energjisë elektrike për kompanitë.
“Nëse ndihma shtetërore do të jetë efektive, ajo duhet të vijë shpejt”, tha Steilemann për gazetën “Frankfurter Allgemeine Sonntagszeitung”.
“Situata është e rëndë. Sidomos në sektorin e NVMV-ve, Ndërmarrjet e Vogla dhe të Mesme, shumë sipërmarrës e kanë shpinën pas murit”, paralajmëroi ai.
“Pothuajse në baza ditore ka pasur kompani që i kanë thënë Industrisë Kimike Gjermane se furnizimi i tyre me energji për vitin e ardhshëm nuk është siguruar ende”, tha ai.
“Nuk ka ndodhur kurrë diçka e tillë në industrinë tonë gjatë dekadave të fundit”, tha Steilemann.
“Kompanitë që kanë vështirësi për të siguruar kontratat e tyre të ardhshme afatgjata për gaz ose energji elektrike duhet të kenë një zgjidhje. Përndryshe, ekziston rreziku i dëmtimit të përhershëm të strukturës së industrisë sonë”, tha Steilemann.//a.i/