Lojtari i Osasunas, Ruben Garcia, përfitoi nga pushimi për ndeshjet e kombëtareve për të udhëtuar në Poloni dhe për të ofruar ndihma humanitare dhe për t’u kthyer me rreth 30 refugjatë ukrainas.
Para se të nisej për në Varshavë, spanjolli organizoi një event për furnizime për popullin ukrainas.
Mbledhja ishte një sukses i madh, dhe lojtari donte të falënderonte përmes rrjeteve të tij sociale të gjithë njerëzit që erdhën për të lënë ushqime, rroba dhe furnizime mjekësore.
Këtë të enjte, Ruben u nis për në Varshavë i shoqëruar nga e dashura, familja, miqtë, një përkthyes dhe një mjek.
Gjithsej 13 persona që udhëtonin me 5 furgona të ngarkuar me ndihma humanitare. Rruga e ekspeditës së drejtuar nga futbollisti kaloi nëpër Paris, Frankfurt, Dresden, Wroclaw dhe Krakov.
Synimi ishte që udhëtimi të bëhej pa ndalesë, me ndërrime të vazhdueshme pas timonit, pasi donin të shkonin në Varshavë sa më shpejt të jetë e mundur.
Pasi arritën në Poloni, ata shkarkuan të gjithë materialin e mbledhur dhe u kthyen me 30 refugjatë ukrainas, duke përfshirë 12 fëmijë, nëna dhe një grua shtatzënë në muajin e shtatë.
Ideja e udhëtimit lindi pasi disa fqinjë të Rubenit i treguan se kishin bërë të njëjtin udhëtim ditë më parë. Futbollisti ka dashur të bëjë diçka të ngjashme dhe të veçantë nga Pamplona dhe pasi e ka diskutuar me familjen ka vendosur të organizojë këtë udhëtim. Për të koordinuar mbërritjen e materialit, Ruben Garcia kontaktoi me shoqatën Asociacion Segunda Familia dhe falë këtij bashkëpunimi, ai do të kthehet në Pamplona me refugjatët ukrainas. Nisma që ai bëri ka një llogari solidariteti që tashmë ka tubuar 12,350 euro.
Klubi dhe trajneri, Jagoba Arrassate, kanë qenë gjithmonë pro iniciativës së Ruben Garcias dhe negociatat mes dy palëve për marrjen e lejes së udhëtimit ishin shumë të thjeshta.
Në çdo moment klubi i kanë dhënë futbollistit të gjitha lehtësitë e mundshme dhe e kanë lejuar të anashkalojë stërvitjen e së enjten në mënyrë që të ketë më shumë kohë për të përfunduar udhëtimin.
