Kompania EVN ka sqaruar sot se tarifa për kompensim të transmetimit dhe distribuimit të energjisë elektrike, të cilët konsumatorët e shohin në faturën e tyre duke filluar nga korriku i këtij viti, nuk është pagesë shtesë për konsumatorët. Kjo tarifë, sipas tyre, deri në korrik është llogaritur në çmimin e energjisë elektrike dhe gjithsesi është paguar. Por me vendim të Komisionit Rregullator për Energjetikë, është vendosur që ky kompensim të figurojë si tarifë e veçantë në faturë, për qëllim transparence siç rekomandohet nga rregulloret evropiane. Kjo nuk do të bëjë dallim në pagesat e konsumatorëve, sipas EVN-së. Kompania austriake gjithashtu thotë se nuk janë të vërteta zërat se konsumatorët paguajnë për humbjet e plota të energjisë elektrike në rrjetin e distrubuimit. Sipas EVN-së, Komisioni Rregullator për Energjetikë njeh vetëm një pjesë të humbjeve të vërteta të energjisë elektrike, ndërkohë që sasi të konsiderueshme të humbjeve të energjisë elektrike nuk njihen dhe drejtpërdrejt i ngarkohen kompanisë, e jo konsumatorëve.
