Paulo Dybala drejt Barcelonës? Nuk është thjesht një hipotezë. Gjithçka mund të ndodhë dhe shtysa më e madhe mund të vijë nga Dani Alves. Ish-shoku i ekipit të “La Joya” në sezonin 2016-2017 ka publikuar një foto në Instagram ku ka bërë shumë tifozë të Barcelonës të ëndërrojnë për një transferim të mundshëm.
Në postimin e mbrojtësit brazilian shihej Dybala dhe Dani Alves që ndërronin bashkë fanellat e Barcelonës dhe të Juventusit, ndërsa fotografia u shoqërua edhe me shkrimin “gjithmonë bashkë vëllai im”. Një sinjal ky që mund të tregojë shumë për të ardhmen e Dybalës, pasi Barcelona është një nga ekipet e shumta të interesuar për shërbimet e argjentinasit.
Megjithatë, katalanasit duhet të mposhtin fillimisht konkurrencën e rivalëve të tjerë. Interi qëndron në “pole position” për shërbimet e Dybala, ndërsa sipas asaj që ka raportuar “La Gazzetta dello Sport”, Beppe Marotta ka pasur edhe një takim me përfaqësuesit e lojtarit ku i kanë ofruar një kontratë me rreth 6 milionë euro në muaj.
Të interesuar përveç zikaltërve mbeten gjithashtu edhe tre ekipe të tjera “big”. Më konkretisht, Tottenham i Antonio Contes që kërkon të përforcojë më shumë sulmin sezonin e ardhshëm. Gjithashtu PSG shihet si një kandidat serioz, pa lënë pas edhe Atletico Madridin.
Kontrata e Paulo Dybalës skadon në fundin e këtij sezoni dhe të dyja palët do të ndahen në verë. /oversport.tv