Përfaqësuesja U-21 e Kosovës në futboll e ka zhvilluar sot stërvitjen e parë për dy ndeshjet kundër Çekisë.
Ndeshjet me Çekinë luhen në kuadër të Grupit G të kualifikimeve për Evropianin e vitit 2023.
“Dardanëve” të rinj u ka dhënë mbështetje përzgjedhësi i përfaqësueses “A”, Bernard Challandes. Ai bashkë me kryetarin e Federatës së Futbollit të Kosovës, Agim Ademi, vizituan futbollistët e Shpresave në stërvitjen që e mbajtën në Qendrën Stërvitore të FFK-së në Hajvali.
FFK-ja bëri të ditur se futbollistët punuan me përkushtim të madh për më shumë se një orë e gjysmë, derisa ata u shprehën optimistë se do të kenë paraqitje të mirë kundër çekëve. Synim është fitorja e dytë në këtë fushatë kualifikuese.
Duelin e parë Shpresat e Kosovës e luajnë në stadiumin “Fadil Vokrri” të enjten, derisa përballja e dytë luhet në Çeki më 12 tetor.
Kosova është në vendin e tretë në Grupin G me tri pikë nga dy ndeshje, ndërsa çekët janë liderë me gjashtë pikë. Në grup me Kosovën është edhe Shqipëria që po ashtu ka tri pikë të fituara.
