BRUKSEL, 7 nëntor /ATSH-DPA/ – E ardhmja industriale e Evropës është në rrezik në një mosmarrëveshje tregtare mbi stimujt e SHBA për prodhuesit vendas të automjeteve elektrike dhe baterive, sipas ministrit francez të ekonomisë Bruno Le Maire.
”Në rrezik është aftësia e Evropës për të qëndruar në garën teknologjike dhe industriale për shekullin e 21-të midis Kinës dhe Shteteve të Bashkuara”, theksoi Le Maire në Bruksel.
Për më tepër, ministri gjerman i Financave, Christian Lindner është i shqetësuar se Shtetet e Bashkuara nuk janë as të vetëdijshme për problemet e Bashkimit Evropian.
Të dy ministrat udhëhoqën 19 anëtarët e eurozonës në shprehjen e shqetësimit për projektligjin e fundit ekonomik të Uashingtonit të quajtur Akti i Reduktimit të Inflacionit (IRA).
Një klauzolë në projektligj jep kredi tatimore për konsumatorët amerikanë që blejnë automjete elektrike me bateri të prodhuara në shtëpi dhe në disa vende me marrëveshje të tregtisë së lirë me Shtetet e Bashkuara.
Bashkimi Evropian ka frikë se kjo klauzolë do të shkaktojë humbje për prodhuesit e saj.
I miratuar në gusht, IRA – një paketë masive e shpenzimeve klimatike me vlerë 700 miliardë dollarë është përpjekja më serioze e bërë ndonjëherë nga ligjvënësit amerikanë për të luftuar kolapsin e klimës me afro 400 miliardë dollarë të destinuara për subvencione për energjinë e pastër. /os/
