Deputeti i Partisë Demokratike Agron Gjekmarkaj, me anë të një postimi në rrjetin e tij social ‘Facebook’ ka komentuar me ironi seancën e sotme parlamentare.
Nuk ka munguar satira mes rreshtave të deputetit të PD-së, ndërsa shkruan: “Elisa nuk kishte ardhur. Jemi mësuar ta shohim gjithmonë atje lart solemne e hazerxhevap tek na tregon udhën e drejtë të perëndisë si zëri, veshi pipëz dhe syri vigjilent i Babos të cilin radhë e meritojmë”.
Reagimi i plotë:
“Kronikë bëmash dhe lavdie nga sallë e Parlamentit !
Doja që në paqe me veten dhe njerëzit ta mbyllja ditën sot ! E fillova mëngjesin si Lej Feni duke u ngjatëruar me të gjithë, shfaqa interes edhe për gjërat që nuk me cimbisin kuriozitetin. Fjalimin që kisha shkruar se lexova duke besuar fuqishëm tek slogani “llafet e tepërta fukarallëk dhe kur flet qeveria rajaja hesht”! Në sallë prej kohesh nuk shihet ish kryetari i ish komisionit të ish rithemelimit ! Njerëzit pyesin ku është vallë firauni se edhe malli na merr e marazi na shtohet se byrazer e kemi. Kohë brengash e turbullirash është kjo. Ca ëndrra mbesin ëndrra përgjithmonë. Hyra nder të parët në Kuvend sot doja të jepja shembull! Ç’më panë sytë , gjeta Çuçin që deneste para interpelancës dhe atë qerrata Ervin Salian si djall që i thoshte “qaj qaj plas aty se të bën mirë” dhe vetë qeshte, ha ha e hi hi. Pashpirtësi të tillë nuk me kishin zënë sytë. Por orë pas ore klima ndryshoi dhe tani e gjej veten duke bërë kroniken e një dite mbushur me bëma e lavdi. Në fillim salla dukej e zymtë !
Psikologjikisht ndiheshim të frustuar. Elisa nuk kishte ardhur. Jemi mësuar ta shohim gjithmonë atje lart solemne e hazerxhevap tek na tregon udhën e drejtë të perëndisë si zëri, veshi pipëz dhe syri vigjilent i Babos të cilin radhë e meritojmë.
Për pak desh mora fjalën për procedurë dhe ta qortoja rëndë zonjën Felaj që pranoi ta fillonte pa të! Herë tjetër do ta bëj. Zili ja kanë që ajo rri në krah të djathtë të Babos dhe porositë i merr direkt nga ai.
Babo jo , ajo jo. Por fati ndërroi drejtim. Ministrja Spiropali erdhi dhe neve të opozitës na u kthye çehrja. Me kostum jeshil ulli ushtarak drejt e nga fronti i luftës ja behu
Por qe ditë e gëzueshme vetë Babo u shfaq. Ju e dini vetë kur Babo vjen salla bie në hare. Babo kur e sheh që nuk mban ujë pilafi e që duhen përzier kartat vjen vete mes nesh. Helbete nafta, çmimet në qiell dhe ai na thotë mos u ankoni se jam unë pa me keq do bëheshin. Babo me avion privat i bie Botes tutje-tehu. Thonë Erdogan ja bëri peshqesh e që në të paskësh zyrë e divanhane po kush e pa që të rrefeje?! Askush se di sa harxhon , sa rroga paguhen për të. Mister i madh se Babo nuk jep llogari.
Fjalimi i tij sot ishte i ceket dhe pa frymëzim. Kjo është dramë për të se është sqimatar i fjales. Mbase mërzia për Kajmaknë. Po kaq Tezja. Nuk ngriti krye. Dy herë mu kryqëzuan shikimet me të po me këqyri hidhur si i padenjë. U pikëllova.
Babo ka disa seanca që “përkedhel” kolegen e dashur Joridë që të duket se debatin e madh e ka me atë e qe ajo të bëhet tabele qitjeje nga të vetët ulur pak më sipër. Eee është i hollë Babo. Por vetëm dy herë na bëri të qeshim se ai i ka me kripe qyfyret si Duçja edhe kur është i shkrehur.
Babo ma ka dëgjuar rixhanë.
Ministrushët me përjashtim të Tigrushit që qeshi vetëm dy herë ëmbël nuk pipetinë. Ministrushet po kaq sus ! Eee është viran Babo i bë tërbiet me një shikim. Dajaku ka dalë nga xheneti. Kur përdoret me karar është bekim. Sapo Babo iku filloi poterja e muhabeti. U shthur urdia. Ikëm në kafe.
Atje një realitet ndryshe. Nuk thonë kot goja llap e shpina dap. Ministreshat të bekuarat më kanë marrë zët nga romuzet që bëj dhe me shumë për Babon se për vete.
Ministrja Ikonomi ishte shumë e gëzuar ! Me durim na rrëfeu sesi një kungull shqiptar kishte ikur nga kopshti i Parlamentit deri në Suedi duke çarë dete si transoqeanik. Ja si sot doja të heshtja po nuk ja dola dot. I mërzitur u ula tek Grida e Jorida. Me qetësuan sa e si munden. Njëra me dha ujë , tjetra keshilla. Mos u mërzit me thanë , nuk i meritojnë satirat e tua. Mu bë zemra mal.
E kush thotë që ato janë Najada e Drijada i plaçin sytë. I gjeta në paqe e harmoni si dy vëllezërit tek parabola e Profetit Muhamet të cilët gëzonin në paqe kur u poq ai me ta. Po kur u kthye kishin vrarë njeri tjetrin nga alkooli se pinë tepër .Ai tha “mallkuar qoftë e tepërta” dhe ndaloi alkoolin. Nuk u ktheva më vonë ti shoh po ato ujë po pinin. Sot opozita ishte në avantazh ndaj mazhorancës. Gratë e saj kishin taka më të larta.
Gaz Bardhi me qerasi me një Red Bull të ftohtë kallkan, dhe bëri mirë. Në kohen e duhur ftoma ra në gurmaz. Xhymert është evlati. Me vonë me Bujar Leskajn e Ed Palokën qamë halle partie e cila vuan ! Në një qoshe dukej Alfred Rushaj. Nuk është ai? Është ai rrinte në ajër dilema teksa në xhepin e Dash Sules shkëlqente një shamizë mëndafshi blu si për të na thënë qe jeta ka edhe lezete të tjera.“-shkruan Gjekmarkaj.
