Kandidati nga Lëvizja Vetëvendosje për kryetar të komunës së Fushë Kosovës, Enver Bajçinca, ka treguar se cilat çështje do t’i kenë prioritet në rast se e merr mandatin në zgjedhjet e 17 tetorit.
Bajçinca në Edicionin Zgjedhor në Klan Kosova, ka thënë që uji i pijshëm dhe kaosi urbanistik janë dy problematikat më të mëdha në këtë komunë.
“Uji i pijshëm – sidomos në zonën e fshtarave. Në shekullin 21 jemi dhe banorët ballafaqohen me mungesë të ujit dhe i shohim duke bartur ujë me bidona – ky është edhe prioriteti në të ardhmen”.
“Pastaj, është edhe kaosi urbanistik me infrastrukturën që nuk i përgjigjet mbipopullimit në Fushë Kosovë. Janë të planifikuara për më pak banorë dhe nuk mund të ju shërbejë”.
Ai ka thënë që problemi i kolonave mund të gjejë zgjidhje me anë të një rrethrrotullimi.
“Është i planifikuar rrethrrotullimi në hyrjen mes Fushë-Kosovës dhe Prishtinës që ta bëjë zbrazjen nga lagjia “Dardania” në drejtim të Prishtinës. Gjithashtu me ministrin Liburn Aliu kemi biseduar që një mënyrë e mirë për ta bërë zbrazjen është që ta bëjmë një kyçje të rrugës magjistrale Prishtinë-Fushë Kosovë prej autostradës, në mënyrë që ata që shkojnë në komuna të tjera, të mos kalojnë kah Fushë Kosova dhe të lirohet paksa hapësira”, tha tutje Bajçinca.
