Policia në Gjilan ka arrestuar dy të dyshuar për armëmbajtje pa leje këtë të shtunë.
Pas arrestimit është bastisur shtëpia e të dyshuarve me ç’rast u konfiskua një armë dhe disa fishekë, njofton Klankosova.tv.
“Pas një pune mirë të organizuar operacionale gjatë hetimit të një rasti, ka arritur tek informata se dy të dyshuar kosovarë D.M.(1976) dhe E.M. (1980) posedojnë një armë zjarri. Në lidhje me këtë ky njësit pas koordinimit dhe marrjes së lejes nga Prokurori i Shtetit ka kryer bastisje në shtëpinë dhe objektet përcjellëse të shtëpisë së të dyshuarve ku ka arritur të gjejë dhe konfiskoj një armë zjarri të llojit Pietro Beretta Gardone V.T. të kalibrit 7.65 mm, shtatë (7) fishekë të kalibrit 7.65 mm dhe një karikator”, thuhet në kumtesë.
Arma së bashku me provat tjera materiale janë konfiskuar si dëshmi për Gjykatë ndërsa të dyshuarit janë arrestuar dhe intervistuar në prani të avokatit mbrojtës.
Në lidhje me rastin është njoftuar Prokurori i Shtetit i cili ka urdhëruar që të dyshuarit të lirohen në procedurë të rregullt, ndërsa rasti me kallëzim penal për veprat penale ,,Armëmbajtje pa leje’’ të procedohet së bashku me provat në Prokurorinë Themelore në Gjilan.
