Admirim Haliti merr detyrën e ministrit: Ta bëjmë këtë vend më të jetueshëm, më premtues dhe shpresëdhënës për rininë

by admin
Spread the love

Admirim Haliti nga partia Alternativa, i cili mbrëmë nga Kuvendi u votua si ministër i Shoqërisë Informatike dhe Administratës, në ditën e parë të detyrës së re, ka shkruar se shpreson që suksesi i kësaj qeverie në përpjekjet për t’i përmirësuar jetët e qytetarëve do t’i gëzojë të gjithë qytetarët e lirë e të zakonshëm të kësaj republike.

“Të trishtuar nga suksesi i një qeverie mund të jenë vetëm një grusht njerëzish, kryesisht politikanë të lartë e oligarkë që suksesin e tyre e kanë ngritur mbi dështimet tona. Më saktë, mbi dështimin e qeverive dhe shoqërisë tonë për të ngritur një sistem të drejtë, një treg funksional e për të kthyer shpresën e rinisë në këtë vend tonin.

Në ditën e parë të kësaj përgjegjësie të madhe që më është ngarkuar, dua t’ju shoh në sy secilin prej jush dhe t’ju them se merita për suksesin e kësaj pune do të jetë e të gjithëve ne, drejtues, staf teknik e qytetarë. Frytet e tij do t’i vjelin qytetarët pa dallim.

Nëse dështoj, përgjegjësia do të jetë vetëm e imja. Por për fat të keq pasojat e keqqeverisjes bien mbi të gjithë qytetarët.

Prandaj, në këtë ditë të parë të punës, ju drejtohem me përulësi për të kërkuar përkrahjen dhe lutjet tuaja që t’ia dalim mbanë së bashku.

Ta bëjmë këtë vend më të jetueshëm, më premtues dhe shpresëdhënës për rininë, më të përgjegjshëm në shërbimin ndaj qytetarëve, më të shpejtë në ndihmën për ta, më modern në administrim.

Le të bëhemi të gjithë bashkë për ndryshimin dhe shpresën për të cilën kemi nevojë që vendi ynë dhe të gjithë qytetarët të jenë fituesit e vërtetë të kësaj sfide”, ka shkruar Admirim Haliti.

You may also like