Gjashtë persona janë akuzuar për trafikim njerëzor pasi 18 emigrantë afganë u gjetën të vdekur brenda një kamioni të hedhur në një rrugë në Bullgari.
Zyrtarët thanë se shoferi kishte refuzuar më parë të ndalonte kamionin, pavarësisht goditjeve të forta dhe të zgjatura nga 52 personat.
Kreu i Shërbimit Hetimor Kombëtar Borislav Sarafov tha se 18 viktimat vdiqën nga një kombinim i mungesës së oksigjenit në një hapësirë të mbyllur dhe vështirësi në frymëmarrje pasi ishin futur në kamion “si në një kanaçe”.
“Viktimat vdiqën ngadalë dhe me dhimbje. Ky rast tregon një pakujdesi ekstreme dhe tregon se migrantët shihen vetëm si mallra që duhet të dërgohen nga një vend në tjetrin, pavarësisht nëse janë të gjallë apo të vdekur”, tha ai.
34 emigrantët e tjerë – të gjetur të premten pranë kryeqytetit Sofje – janë në gjendje të qëndrueshme në spital.
Pesë nga të akuzuarit ndodhen në paraburgim, ndërsa një nga trafikantët e dyshuar, i cili kishte arritur të largohej nga vendi, është në kërkim me urdhër arresti europian.
Prokurorët thanë se rrjeti kishte trafikuar emigrantë nga kufiri me Turqinë përmes Bullgarisë në Serbi, nga ku ata vazhduan udhëtimin e tyre kryesisht në Britani, Gjermani dhe Francë.
Shoferi i kamionit dhe shoqëruesi i tij u akuzuan gjithashtu për vdekjet.
Incidenti ka tronditur Bullgarinë, në atë që është një nga incidentet më të këqija të këtij lloji në rrugën tokësore nëpër Ballkan për në Evropë.
Bullgaria është një portë për emigrantët që vijnë në Bashkimin Evropian përmes Turqisë. Qeveria është akuzuar për keqtrajtim të refugjatëve ndërsa ata tentojnë të hyjnë në kontinent.
Bullgaria është pjesë e Bashkimit Evropian dhe shpreson të anëtarësohet në zonën Shengen, e cila i lejon njerëzit të lëvizin lirshëm përtej kufijve brenda saj.
Vitin e kaluar, më shumë se 150,000 njerëz tentuan të kalonin kufirin me Turqinë, që ishte më shumë se katër herë më i lartë se një vit më parë.
Top Channel
